स्याङ्जा: स्याङ्जा जिल्लाको वालिङ नगरपालिका वडा नम्बर ५ जर्कोटमा मोटरसाइकलको आवाजलाई लिएर भएको विवादमा एक व्यक्तिको ज्यान गएको घटनाका एक फरार प्रतिवादी ६५ (पैंसठ्ठी) दिनपछि पक्राउ परेका छन्।
पक्राउ पर्नेमा जिल्ला स्याङ्जा, चापाकोट नगरपालिका वडा नम्बर ५ काम्ती वतन भएका १९ वर्षीय पर्बत खवास रहेका छन्।
घटनाको विवरण
मिति २०८२ भदौ ०७ गते राति वालिङ् नगरपालिका-०५, जर्कोटमा मोटरसाइकल चर्को आवाजमा चलाएको विषयमा विवाद हुँदा सोही ठाउँ बाहुनडाँडा बस्ने ३२ वर्षीय ढाल बहादुर थापालाई कुटपिट गरी घाइते बनाइएको थियो। घाइते थापाको उपचारको क्रममा मृत्यु भएको थियो।
पक्राउ र कारबाही
घटनापछि फरार रहेका खवासलाई इलाका प्रहरी कार्यालय चापाकोट, स्याङ्जाबाट खटिएको प्रहरी टोलीले मिति २०८२ कात्तिक ११ गते उनकै वतन चापाकोट नगरपालिका-०५, काम्तीबाट लुकिछिपी बसेको अवस्थामा पक्राउ गरेको हो।
पक्राउ परेका प्रतिवादी खवासलाई मिति २०८२ कात्तिक १२ गते सम्मानित स्याङ्जा जिल्ला अदालतमा पेश गरिएकोमा आज मिति २०८२ कात्तिक १३ गते अदालतको आदेशानुसार पुर्पक्षको लागि जिल्ला कारागार, स्याङ्जा चलान गरिएको छ।
यसअघि पनि ७ जना कारागार चलान
प्रहरीका अनुसार, सो घटनामा संलग्न रहेका प्रतिवादीहरू मध्ये यसअघि नै ७ (सात) जनालाई अनुसन्धान पश्चात पुर्पक्षको लागि मिति २०८२ असोज ०२ गते जिल्ला कारागार स्याङ्जा चलान गरिसकिएको थियो।