कास्कीमा जुवातास खेल्ने-खेलाउने ७ जना पक्राउ, करिब रु. ३ लाख नगद बरामद 
      कास्की। कास्की जिल्लाको पोखरामा जुवातास खेलिरहेको अवस्थामा थप ७ जना मानिसहरुलाई नगद सहित प्रहरीले नियन्त्रणमा लिएको छ।
जिल्ला प्रहरी कार्यालय कास्कीका अनुसार, जुवातास खेलिरहेको भन्ने विशेष सूचनाको आधारमा मिति २०८२ साल असोज ४ गते (अन्दाजी ४:३० बजे) वडा प्रहरी कार्यालय बगरबाट खटिएको प्रहरी टोलीले पोखरा महानगरपालिका वडा नं. १६, माथिल्लो दिपस्थित एक स्थानबाट जुवातास खेलिरहेका ७ जनालाई पक्राउ गरेको हो।
उनीहरुको साथबाट प्रहरीले ४ बुक तास र नगद रु. २,९५,६७५/- (दुई लाख पन्चानब्बे हजार छ सय पचहत्तर रुपैयाँ) बरामद गरेको छ। पक्राउ परेकाहरुलाई नियन्त्रणमा लिई थप अनुसन्धान प्रक्रिया अगाडी बढाइएको प्रहरीले जनाएको छ।
हालसम्म २७ जना पक्राउ, करिब रु. ९ लाख बरामद
यससँगै कास्कीमा जुवातास खेल्ने कार्यमा संलग्न भई हालसम्म जम्मा २७ जना मानिसहरुलाई पक्राउ गरिएको छ। उनीहरुको साथबाट नगद रु. ८,९७,७८०/- (आठ लाख सन्तानब्बे हजार सात सय अस्सी रुपैयाँ) बरामद गरिएको प्रहरीले जानकारी दिएको छ।
कानूनविपरीत जुवातास खेल्ने-खेलाउने कार्यमाथि जिल्ला प्रहरी कार्यालय कास्कीले निगरानी बढाउँदै आएको छ।