स्याङ्जा । जिल्ला स्याङ्जाको चापाकोट नगरपालिका क्षेत्रमा अवैध रूपमा नदिजन्य पदार्थ उत्खनन तथा ओसार-पसारमा संलग्न रहेका दुईवटा ट्याक्टरलाई प्रहरीले नियन्त्रणमा लिएको छ।
मिति २०८२ साल असोज २२ गते राती करिब १० बजे (२२:०० बजे) को समयमा नदिजन्य पदार्थ अवैध रूपमा उत्खनन तथा ओसार-पसार भइरहेको भन्ने सूचनाको आधारमा प्रहरीले यो कारबाही अगाडि बढाएको हो।
इलाका प्रहरी कार्यालय चापाकोट र अस्थायी प्रहरी चौकी दामाचौर, स्याङ्जाबाट खटिएको संयुक्त प्रहरी टोलीले चापाकोट नगरपालिका वडा नम्बर-०७ स्थित बनकट्टा घाटबाट ट्याक्टर नियन्त्रणमा लिएको हो।
नियन्त्रणमा लिइएका ट्याक्टरहरूमा लु. ४ त. १८६४ र लु. ४ त. ९७२४ नम्बरका ट्याक्टरहरू रहेका छन्। यी दुवै ट्याक्टरमा बालुवा लोड गरी ओसार पसार गरिरहेको अवस्थामा फेला परेका थिए।
प्रहरीले अवैध कार्यमा संलग्न ट्याक्टरहरूलाई नियन्त्रणमा लिई आवश्यक अनुसन्धान तथा कारबाहीको लागि चापाकोट नगरपालिकाको कार्यालय, चापाकोट, स्याङ्जामा पठाएको छ।
अवैध उत्खनन तथा चोरी निकासी रोक्ने अभियान अन्तर्गत प्रहरीले जिल्लाभरि निगरानी बढाइरहेको जनाइएको छ।
