प्रधानमन्त्रीसँग सांसद डुम्रेको 'स्याङ्जा एजेन्डा': सिद्धार्थ राजमार्गदेखि बाँदर समस्यासम्मका ७ बुँदामा ध्यानाकर्षण
स्याङ्जा ।
स्याङ्जा निर्वाचन क्षेत्र नम्बर २ का प्रतिनिधि सभा सदस्य झविलाल डुम्रेले प्रधानमन्त्री बालेन्द्र साहलाई भेटेर स्याङ्जाको समग्र विकास र दीर्घकालीन समस्या समाधानका लागि विशेष 'रोडम्याप' प्रस्तुत गर्नुभएको छ ।
सिंहदरबारस्थित प्रधानमन्त्री कार्यालयमा शुक्रबार भएको भेटवार्तामा सांसद डुम्रेले गण्डकी प्रदेशका अन्य सांसदहरूसहित स्याङ्जाली जनताका आधारभूत आवश्यकता र नीतिगत सुधारका विषयमा प्रधानमन्त्रीको गम्भीर ध्यानाकर्षण गराउनुभएको हो ।
विरासत र विकासको सन्तुलन
भेटका क्रममा सांसद डुम्रेले केवल भौतिक पूर्वाधार मात्र नभई स्याङ्जाको प्राकृतिक स्रोतको संरक्षण र कृषि क्षेत्रको आधुनिकिकरणलाई मुख्य प्राथमिकतामा राख्नुभएको छ । उहाँले प्रस्तुत गर्नुभएका मुख्य बुँदाहरू यस प्रकार छन्:
- सिद्धार्थ राजमार्गको 'कायापलट': सिद्धार्थ राजमार्गलाई केवल आवागमनको माध्यम मात्र नभई आर्थिक र पर्यटकीय कोरिडोरको रूपमा विकास गर्न सांसद डुम्रेले माग गर्नुभएको छ ।
- प्राकृतिक स्रोतमाथिको 'सिन्डिकेट' अन्त्य: कालीगण्डकी, आँधीखोला र ज्याग्दीखोलामा भइरहेको अवैध गिट्टी–बालुवा उत्खनन र त्यहाँ व्याप्त सिन्डिकेटलाई तोड्दै नदीहरूको दिगो संरक्षणका लागि ठोस कदम चाल्न उहाँले प्रधानमन्त्रीलाई आग्रह गर्नुभयो ।
- किसानलाई 'कृषि एम्बुलेन्स' र बाँदर नियन्त्रण: स्याङ्जाली किसानका लागि सुन्तला र आलु खेतीको प्रवर्द्धन, उत्पादनका आधारमा सिधै किसानको हातमा अनुदान पुग्ने व्यवस्था र खेतीबाली नष्ट गर्ने बाँदर समस्याको स्थायी समाधानका लागि उहाँले नीतिगत पहलको माग राख्नुभएको छ ।
- स्वास्थ्य र शिक्षामा आमूल सुधार: जिल्लाको स्वास्थ्य क्षेत्रको वर्तमान अवस्थालाई सुधार्न र स्याङ्जाको शैक्षिक गरिमालाई समयानुकुल बनाउन आवश्यक बजेट र योजनाका बारेमा छलफल भएको छ ।
- पर्यटन र खेलकुदमा 'ब्राण्डिङ': धार्मिक तथा साहसिक पर्यटनका लागि स्याङ्जाको भू-धरातल विश्वमै उत्कृष्ट रहेको उल्लेख गर्दै खेलकुद क्षेत्रको विकासका लागि विशेष योजना ल्याउन उहाँले जोड दिनुभएको छ ।
- आधारभूत आवश्यकता: खानेपानी र सिँचाइको समस्याले जनताले भोग्नुपरेको सास्तीबारे जानकारी गराउँदै ती समस्या समाधानका लागि राज्यको स्रोत परिचालन गर्न आग्रह गरिएको छ ।
भेटपछि सांसद डुम्रेले स्याङ्जाको विकासका लागि आफूले उठाएका विषयहरूमा प्रधानमन्त्री सकारात्मक रहनुभएको र यी मागहरू छिट्टै कार्यान्वयनको चरणमा जाने विश्वास व्यक्त गर्नुभएको छ ।
