वालिङ, स्याङ्जा।
स्याङ्जाको वालिङ नगरपालिकाले आफ्नो स्थानीय उत्पादन, संस्कृति र पर्यटनलाई प्रवर्द्धन गर्ने उद्देश्यका साथ “हाम्रो नगरमा हाम्रै खाना, स्थानीय उत्पादन वृद्धि—हाम्रो चाहना” भन्ने मूल नारासहित पहिलो वालिङ सडक खाना महोत्सव–२०८२ को तयारी पूरा गरेको छ। नगरपालिकाले मंगलबार पत्रकार सम्मेलन आयोजना गरी महोत्सवका सबै तयारी अन्तिम चरणमा पुगेको जनाएको हो।
१६ जातजातिका मौलिक परिकार मुख्य आकर्षण
महोत्सवको सबैभन्दा ठूलो र महत्त्वपूर्ण आकर्षण वालिङमा बसोबास गर्ने १६ जातजातिका मौलिक परिकार हुनेछन्।
नगरपालिकाका अनुसार गुरुङ, मगर, थकाली, नेवार, राई, लिम्बू, तामाङ, कुमालसहित स्थानीय जनजातिका परम्परागत खानाका स्वाद, विधि र सांस्कृतिक महत्त्वलाई एकै ठाउँमा प्रस्तुत गरिनेछ। यसले वालिङको सांस्कृतिक पहिचानलाई समग्र र मजबुत रूपमा प्रदर्शन गर्ने अपेक्षा गरिएको छ।
कला, संस्कृति र भेषभूषाको सामूहिक प्रस्तुति
परिकारका साथै १६ समुदायका नृत्य, भेषभूषा र परम्परागत रीतिरिवाज तथा जीवनशैली को सामूहिक प्रस्तुति पनि महोत्सवमा देखाइनेछ।
आँधीखोला सभ्यताको ऐतिहासिक पक्ष, स्थानीय संस्कृतिको विविधता र समग्र नगरको पहिचानलाई समेटेर विशेष प्रस्तुतिहरू तयार पारिएका छन्।
महोत्सवले स्थानीय खानाको संरक्षण र प्रवर्द्धनमा जोड दिँदै 'मौलिक खानालाई आधुनिक बजारसम्म' पुर्याउने अभियानलाई गति दिनेछ। पुरानो परिकार ढिंडो–गुन्द्रुकदेखि आधुनिक खानासम्म समेटेर संरक्षण र बजार विस्तारमा ध्यान दिइएको छ।
साथै, स्थानीय किसानहरूका फलफूल, तरकारी, मौसमी बाली, बीउ–बिजन तथा नवीन कृषि प्रविधिको प्रदर्शनी गरिनेछ। यसले स्थानीय उत्पादनमा आत्मनिर्भरता र बजार सक्रिय बनाउन सहयोग पुर्याउने नगरपालिकाले विश्वास लिएको छ।
कार्यक्रम: राष्ट्रिय तथा स्थानीय कलाकारका सांगीतिक प्रस्तुति, युवामुखी कार्यक्रम र पारिवारिक मनोरञ्जनका स्टलहरू सञ्चालन गरिनेछन्।
महोत्सव मंसिर १७ देखि १९ गतेसम्म तीन दिनका लागि पतञ्जलि योगपीठदेखि सुर्कौदी पुलसम्म फैलिएको आँधीखोला करिडोर क्षेत्रमा सञ्चालन हुनेछ।
महोत्सवका लागि वालिङ नगरपालिकाले ६ लाख रुपैयाँ विनियोजन गरेको छ।
कुल स्टल संख्या २५ वटा
कृषि स्टल निःशुल्क
अन्य स्टल शुल्क प्रतिदिन रु. १,०००
स्थानीय खानाको संरक्षण, सांस्कृतिक विविधताको प्रवर्द्धन र नगर ब्रान्डिङका लागि पहिलो पटक आयोजना हुन लागेको यो महोत्सवले वालिङको पहिचानलाई नयाँ उचाइमा पुर्याउने विश्वास लिइएको छ।
