बुटवल/भैरहवा। नेकपा (एमाले) का केन्द्रीय सदस्य एवं राष्ट्रिय ट्रेड युनियन महासंघ (जिफन्ट) नेपालका केन्द्रीय उपाध्यक्ष कमल गौतमको आकस्मिक निधन भएको छ।
विद्युत कटौतीको विषयलाई लिएर बिहीबार भैरहवा (नेपाल विद्युत प्राधिकरण कार्यालय अगाडि) मा आयोजित धर्ना कार्यक्रममा मजदुरहरुको तर्फबाट बोल्दै गर्दा उहाँ अचानक ढल्नुभएको थियो।
६५ वर्षीय गौतमलाई तत्कालै मणिग्रामस्थित क्रिमसन अस्पताल पुर्‍याइएको भए पनि चिकित्सकहरूले उहाँलाई मृत घोषणा गर्नुभएको हो। प्रारम्भिक जानकारी अनुसार उहाँको हृदयघातका कारण निधन भएको बताइएको छ।
उहाँ ढलेको खबर पाएलगत्तै अस्पताल बाहिर आफन्तजन, जिफन्ट सम्बद्ध नेता-कार्यकर्ता एवम् शुभेच्छुकहरूको बाक्लो भिडभाड रहेको छ। बुटवल उपमहानगरपालिका–३ ज्योतिनगरका स्थायी बासिन्दा गौतम २०५४ सालदेखि पार्टी र जिफन्टमा सक्रिय हुनुहुन्थ्यो।
यस दुःखद घडीमा दिवङ्गत गौतमप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछौँ।