गल्याङ: स्याङ्जा जिल्लाभरिका फोटोपेशामा संलग्न व्यवसायीहरूलाई एकीकृत गर्ने उद्देश्यले स्थापित ‘फोटोग्राफर मञ्च स्याङ्जा’को दोस्रो अधिवेशन तथा साधारण सभा शनिबार गल्याङमा सम्पन्न भएको छ। अधिवेशनले हिमाल न्यौपानेलाई सर्वसम्मत रूपमा मञ्चको नयाँ अध्यक्षमा चयन गरेको छ।
जिल्लाभरका फोटो व्यवसायीहरूको उल्लेख्य सहभागिता रहेको अधिवेशनले न्यौपानेको अध्यक्षतामा १५ सदस्यीय नयाँ कार्यसमिति पनि गठन गरेको छ।
नवगठित कार्यसमितिको वरिष्ठ उपाध्यक्षमा बाबुराम रेग्मी, उपाध्यक्षमा शिव भण्डारी, सचिवमा प्रदीप पाठक, र कोषाध्यक्षमा विकास खाँण सर्वसम्मत रूपमा चयन भएका छन्।
कार्यक्रमलाई सम्बोधन गर्दै नव-निर्वाचित अध्यक्ष हिमाल न्यौपानेले जिल्लाका सम्पूर्ण फोटोग्राफरहरूलाई संगठित गर्दै पेशागत हकहितको पक्षमा संस्थालाई सशक्त रूपमा अगाडि बढाउने प्रतिबद्धता व्यक्त गरे।
स्थानीय स्तरमा व्यावसायिक एकता र सशक्तिकरणका लागि यो अधिवेशन महत्वपूर्ण कोसेढुङ्गा सावित हुने अपेक्षा गरिएको छ।
अधिवेशन कार्यक्रम बिमल खनालको सभापतित्व तथा फोटोग्राफर मञ्च गण्डकी प्रदेशका उपाध्यक्ष तुल्सिराम रेग्मीको प्रमुख आतिथ्यतामा सम्पन्न भएको थियो।
कार्यक्रममा गल्याङ नगरपालिका वडा नं. ३ का अध्यक्ष कृष्ण प्रसाद भट्टराई, फोटोग्राफर मञ्च, गण्डकी प्रदेशका महासचिव प्रेम पराजुली, गल्याङ चेम्वर अफ कमर्शका अध्यक्ष अर्जुन रानाभाट, ढाकाराम खनाल, बाबुराम रेग्मी र प्रदिप पाठक लगायतले मन्तव्य व्यक्त गरेका थिए।
