जेन्जी आन्दोलन संगै विकसित नयाँ परिस्थितिका बारेमा स्याङ्जाको वालिङमा सरोकारवालाहरुसंग सर्वपक्षीय अन्तरक्रिया कार्यक्रम सम्पन्न भएको छ । अकला आवाज राष्ट्रिय साप्ताहीकको आयोजनामा जेन्जी आन्दोलन, वर्तमान परिवेश, चुनौती र अवसर विषयक खुल्ला अन्तरक्रिया कार्यक्रम गरिएको हो । कार्यक्रममा उपस्थित विभिन्न क्षेत्रका झण्डै दुई दर्जन भन्दा  बढी वक्ताहरुले जेन्जी पुस्ताको बलिदानले देशलाई सहि मार्ग प्रदान गरोस भन्ने अपेक्षा र  विश्वास व्यक्त गरेका छन् । 

कार्यक्रमका अवसरमा जेन्जी  प्रतिनिधि अभिषेक गुरुङले जेन्जीको बलिदानले देशमा परिवर्तन आउन सम्भव भएको बताउदै आफूहरूले विध्वंस मच्चाउने मनसाय नभएको भन्दै भ्रष्टाचार र अनियमितता विरुद्धको आन्दोलन भएको बताएका थिए । कार्यक्रमको शुरुआतमै आयोजक अकला आवाजले  जेन्जी प्रतिनिधि अगुवा अभिषेक गुरुङलाई जेन्जी आन्दोलनको उदेश्य,अपेक्षा र भावी योजनाको बारेमा बिषयबस्तु राख्न दिएको थियो । गुरुङले समग्र आन्दोलन र त्यसमा स्याङ्जा वालिङ् क्षेत्रको भुमिका र प्रभाव बारे महत्त्वपूर्ण धारणा राखेका थिए । कार्यक्रममा जेन्जी प्रतिनिधि रोनिश श्रेष्ठ,ध्रुब तिवारी लगायतले विकास निर्माण र नागरिकको अपेक्षाका बारेमा धारणा राखेका थिए ।
त्यस्तै कार्यक्रममा  पूर्वमन्त्री पदमा कुमारी अर्यालले गत भदौ २३ र २४ गतेको जेन्जी आन्दोलनका क्रममा सहादत प्राप्त गर्नुभएका युवाहरु प्रति श्रद्धाञ्जली व्यक्त गर्दै दुई तत्वका कारण आन्दोलनले फरक मोड लिएको बताइन् । अर्यालले आन्तरिक तथा बाह्य तत्वका कारण देशले मानवीय तथा भौतिक क्षति बेहोर्नु परेको बताउदै
जेन्जीले विशुद्ध भावना लिएर देशमा व्याप्त भ्रष्टाचार विरुद्ध आन्दोलन गरेको भन्दै उहाँले जेन्जी भुमिमा टेकेर भोलीको देशको मार्गचित्र तयार गर्नुपर्ने बताइन्  । नेपालमा पछिल्लो समय राजनीतिक पूर्वाग्रहका कारण सामाजिक सञ्जालमा आएका भ्रामक प्रचारका आधारमा निर्दोषलाई पनि दोषि बनाइदिने प्रचलन हाबी भइरहेका कारण यस्तो गर्न नहुने र दोषीलाई कारबाही गर्नुपर्ने उहाँको भनाई थियो ।
मन्त्री अर्यालले वर्तमान संसद पुनःस्थापित गराई अन्तरिम संसदमा जेन्जी पुस्ताको प्रतिनिधित्व गराएर संविधान संसोधन गर्नेपर्नेमा जोड दिईन् ।
यस्तै वालिङ नगरपालिकाका पूर्व नगरप्रमुख तथा गरिमा विकास बैंकका अध्यक्ष दिलिपप्रताप खाँणले पुराना राजनीतिक दलका व्यक्तिहरु सुध्रिनुको विकल्प नरहेको बताउदै पुराना पार्टिप्रति नागरिकको वितृष्णा बढ्दै गएको र देशमा जुन प्रकारको वेतिथी र भ्रष्टाचार मौलाएको थियो त्यसकारण नै देशमा यस्तो अवस्था सिर्जना भएको बताए । खांणले आफू पनि नेपाली काङ्ग्रेसको सदस्य भएपनि केही समय देखि धेरै सक्रिय नभएको बताउदै  मौजुदा संविधानले देश नबन्ने दाबी गरेका थिए । वर्तमान सविधानले  बहुमतको सरकार बनाउन गाह्रो हुने र फेरी त्यही अवस्थामा देश चल्ने भएकाले संविधान संसोधन गर्नुपर्ने उल्लेख गरे ।
कार्यक्रममा युवा अगुवा विष्णु पौडेल, वालिङ, १२ का वडा अध्यक्ष विश्वजंग गुरुङ, वालिङ १ का पूर्व वडा अध्यक्ष केदार काफ्ले, नेपाल पत्रकार महासंघ गण्डकी प्रदेश सदस्य श्रीकृष्ण सिग्देल, उद्योग वाणिज्य संघ वालिङका महासचिव रमेश अर्याल, प्याब्सनका केन्द्रिय सदस्य होमकान्त गौतम, सरस्वती माध्यमिक विद्यालयका प्रअ याम बहादुर कुँवर, पूर्णामृत भवानी माविका प्रअ दिपक लम्साल, लक्ष्मी माविका प्रअ सिता गौडेल गैह्रे, सामाजिक अगुवा जगदिश गैह्रे, बैकर्स क्लब वालिङका अध्यक्ष प्रेम नारायण अर्याल, व्यवसायी भीम लूईटेल, साहित्कार पारिश्वर न्यौपाने  लगायतले पुराना राजनीतिक दलहरु अब सच्चीनुपर्नेमा जोड दिँदै जेनजि समूहका सकरात्मक पक्षहरुको साथमा रहेको बताएका थिए ।
कार्यक्रममा वालिङ आसपासका विभिन्न संघ संस्था,नागरिक समाज,व्यवसायी अगुवा लगायतको उपस्थिति रहेको थियोे ।
कार्यक्रममा अकला आवाज राष्ट्रिय साप्ताहिकका अध्यक्ष तथा प्रधानसम्पादक प्रकाश डुम्रेले कार्यक्रमको सहजीकरण गर्दै पछिल्लो विकसित परिस्थितीमा मिडिया जगतले सर्वपक्षीय आवाजहरुलाई प्रतिनिधित्व गर्ने हिसाबले यस प्रकारका कार्यक्रमहरु आयोजना गर्ने बताउदै शुसासन, सामाजिक न्याय र समृद्ध जिल्ला र राष्ट्र निमार्णमा भुमिका खेल्ने विश्वास व्यक्त गरेका थिए ।
अध्यक्ष डुम्रेले सामाजिक न्याय र सुशासनको लागि निरन्तर अकला आवाजले जनताको आवाज उठाउने प्रतिबद्धता व्यक्त गरेका थिए । कार्यक्रमको अध्यक्षता प्रकाश डुम्रेको थियोे भने प्रारम्भिक सञ्चालन आयुष्मा काफ्ले र सहजीकरण कार्यकारी सम्पादक शिव डुम्रेले गरेका थिए ।