संवाददाता 
           स्याङ्जाको भीरकोटमा रहेको श्रेष्ठ पेट्रोलपम्पमा प्रशासन तथा नापतौल विभागले  ३ दिन कुनै पनि प्रकारको  बिक्रीवितरण नगर्न निर्देशन दिएको छ । आइतबार भएको अनुगमनमा पम्पले १५ मि.लि. कम हुने गरि डिजेल बेचेको भेटिएको प्रशासनले जनाएको छ । प्रशासनले उक्त पम्पलाई ३ दिनभित्र कागजात सहित प्रशासनमा हाजिर हुन समेत निर्देशन दिएको बुझिएको छ । डिजेल पम्पमा १५ एमएल कम बनाएर बिक्रीवितरण गरिएको रहेछ,यसको बारेमा अनुसन्धान गर्दैछौं स्रोतले भन्यो । पम्पलाई तत्काल बिक्रीवितरण नगर्न भनेका छौं । अनुसन्धान पछि थप कारबाही अगाडि बढ्छ विभागले भन्यो ।
यस्तै वालिङ् मिर्दीमा रहेको शिवम् पेट्रोलपम्ममा भने बढी मात्रामा बिक्रीवितरण भएको भेटिएको बुझिएको छ । पेट्रोलको पम्पबाट प्रतिलिटर ५ एमएल बढी बेचिएको देखिएको हो । कानुनतः बढी मात्रामा बिक्रीवितरण गरेको देखिएपनि त्यो कानुन विपरीत हुने भएपछि उक्त पम्पमा पनि बिक्रीवितरण रोकि कागजात सहित प्रशासन र विभाग हाजिर हुन भनिएको छ ।
पम्पले मिटर बिग्रेकाले धेरै मात्रामा गएको बताएको छ ।
यस्तै वालिङ् मोडमा रहेको भुषाल भण्डारमा समेत पेट्रोल वा डिजल भण्डारणमा त्रुटिपूर्ण देखिएपछि सच्याउन निर्देशन दिएको बुझिएको छ ।
यता वालिङ्का व्यवसायी दिपक भुषालले आफ्नो गाडीमा राखेको डिजलमा पानी भेटिएको बताएका छन् । दुई पटकसम्म डिजल राख्दा पानी भेटिएको बताए ।
भुषालले भने विभागले कडाइसाथ अनुगमन र कारबाही गर्नुपर्छ । पहुँच र प्रभावका आधारमा यताउता नगरी उपभोक्तालाई लुट र ठगी मच्चाउनेहरुलाई कारबाही हुनेपर्ने बताएका छन् । यता गल्याङ,चापाकोट र मिर्मीका पम्पमा भने अनुगमन गरिएको छैन् ।