स्याङ्जा। निजी तथा आवासीय विद्यालय अर्गनाइजेसन नेपाल (प्याब्सन) स्याङ्जाले आफ्ना सदस्य श्री सुवर्ण लुइँटेलमाथि भएको साङ्‌घातिक आक्रमणप्रति गम्भीर ध्यानाकर्षण भएको जनाएको छ।
हालै जारी गरिएको एक विज्ञप्ति मार्फत प्याब्सन स्याङ्जाले आफ्ना सदस्य लुइँटेलमाथि बिना कारण भएको आक्रमणको घोर भर्त्सना एवं निन्दा गरेको छ।
प्याब्सनले उक्त आक्रमणको घटनाले शिक्षा क्षेत्रमा लागेका व्यक्तिहरूको सुरक्षामाथि प्रश्न उठाएको भन्दै आक्रोश व्यक्त गरेको छ। संगठनले घटनाको सत्यतथ्य पत्ता लगाई दोषीलाई कानुनबमोजिम कारवाही गर्न सम्बन्धित निकायसँग हार्दिक अपिल गरेको छ।
विज्ञप्तिमा, "उक्त घटनाको निष्पक्ष छानविन गरी दोषी उपर कानुनबमोजिम कारवाही होस् भनी सम्बन्धित निकायप्रति हार्दिक अपिल गर्दछौं," भनिएको छ।
साथै, प्याब्सन स्याङ्जाले आक्रमणबाट घाइते भएका सदस्य सुवर्ण लुइँटेलको शीघ्र स्वास्थ्यलाभको कामना समेत गरेको छ।
घटनाका थप विवरणहरू सार्वजनिक गर्न र दोषीलाई कारवाहीको दायरामा ल्याउन प्याब्सन स्याङ्जाले सरोकारवाला निकायलाई दबाब दिने जनाएको छ।