स्याङ्जा 

       बढ्दो सवारी दुर्घटनालाई मध्यनजर गर्दै स्याङ्जा जिल्लाको वालिङ नगरपालिकाको ग्रामीण र बजार क्षेत्रमा ट्राफिक प्रहरीले 'गति सीमितता' (Speed Limit) को बोर्डहरू जडान गरेको छ ।
वालिङ ट्राफिक प्रहरी कार्यालयको समन्वयमा नगरपालिकाका मुख्य सडक र बस्ती क्षेत्रमा निश्चित गति सीमा तोकिएका बोर्डहरू राखिएको हो । तीव्र गति नै धेरै दुर्घटनाको मुख्य कारण हुने निष्कर्षका साथ यो कदम चालिएको हो ।

ट्राफिक प्रहरीले सवारी चालकहरूलाई तोकिएको गति सीमाको पूर्ण पालना गर्न आग्रह गरेको छ । यो अभियानले तीव्र गतिका कारण हुने दुर्घटना न्यूनीकरणमा महत्त्वपूर्ण सहयोग पुग्ने विश्वास वालिङ ट्राफिक प्रहरीले लिएको छ । साथै, ट्राफिक नियम उल्लंघन गर्ने चालकहरूलाई नियमानुसार कारबाही गरिने चेतावनी पनि दिइएको छ।
स्थानीयले ट्राफिकको यो प्रयासलाई सकारात्मक रूपमा लिएका छन् र यसले सडक सुरक्षा सुधार गर्न मद्दत पुग्ने अपेक्षा राखेका छन् ।