स्याङ्जा— मानव स्वास्थ्यमाथि गम्भीर लापरबाही भएको एक घटनामा, स्याङ्जाको वालिङ नगरपालिका वडा नम्बर ७, ताप्के मा आयोडिन नुनको प्याकेटभित्र मृत भ्यागुतो भेटिएको छ। यो अत्यन्तै संवेदनशील र चिन्ताजनक घटना हो, जसले खाद्य सुरक्षा र उपभोक्ताको स्वास्थ्यमाथि प्रश्नचिन्ह खडा गरेको छ।
प्राप्त जानकारी अनुसार, वालिङ ६, मिर्दीस्थित एक पसलबाट खरिद गरिएको नुनको प्याकेट खोल्दा त्यसभित्र मरेर सुकेको अवस्थामा भ्यागुतो फेला परेको थियो। यस्तो अखाद्य वस्तु उपभोक्ताको दैनिक उपभोग्य सामग्रीमा भेटिनुले उत्पादन, प्याकेजिङ तथा बजार वितरण प्रक्रियामा देखिएको चरम लापरबाही प्रस्ट पारेको छ।
स्याङ्जामा उपभोक्ता संरक्षण र हितका विषयमा विभिन्न समयमा छलफल तथा अभियानहरू सञ्चालन भए पनि प्रभावकारी र निरन्तर अनुगमनको अभावका कारण यस्ता समस्याहरू दोहोरिँदै आएका छन्। यसअघि केही समयअगाडि मात्र तेलमा गम्भीर अखाद्य पदार्थ भेटिएपछि अकला आवाज जस्ता सरोकारवाला निकायले गुणस्तर विभागलाई ताकेता गरी अनुगमन र नियमन बढाउन लगाएका थिए।
तर, अनुगमनको कडाइ केही समयसम्म मात्र सीमित रह्यो र त्यसपछि पुनः अनुगमन फितलो हुँदै गएको देखिन्छ। यस घटनाले स्पष्ट पारेको छ कि, बजार अनुगमन र खाद्य वस्तुको गुणस्तर नियन्त्रणको कामलाई मौसमी वा तात्कालिक नभई निरन्तर र प्रभावकारी रूपमा सञ्चालन गर्न अपरिहार्य छ।
यस घटनाले उपभोक्ताको स्वास्थ्यसँग जोडिएको संवेदनशीलतालाई औंल्याउँदै, सम्बद्ध निकायहरू – जस्तै: गण्डकी प्रदेश , खाद्य प्रविधि तथा गुण नियन्त्रण विभाग, र उपभोक्ता हित संरक्षण मञ्च – ले नुनको उत्पादन र बिक्रीवितरण गर्ने कम्पनी माथि कडा कारबाही गर्न र बजार अनुगमनलाई तत्काल कडा बनाउन जरुरी देखिन्छ।
उपभोक्तालाई सुझाव: उपभोग्य वस्तु खरिद गर्दा सधैँ उत्पादन मिति, उपभोग्य म्याद, र प्याकेजिङको अवस्था राम्ररी जाँच्नुहोस् र शंका लागेमा तत्काल सम्बन्धित निकायमा खबर गर्नुहोस्।