स्याङ्जा ।
सुन्तला उत्पादनमा अग्रणी जिल्ला स्याङ्जामा यस वर्ष अत्यधिक सुन्तला फलेपछि यतिबेला किसानहरूलाई सुन्तला टिप्न र त्यसको ग्रेडिङ (छुट्याउने) गर्न भ्याई नभ्याई भएको छ। ‘सुन्तला सुपरजोन’ का रूपमा परिचित यस जिल्लाका किसानहरूका लागि सुन्तला नै प्रमुख आम्दानीको स्रोत बनेको छ।
सुन्तला बगैँचामा अहिले किसानहरू व्यस्तताका साथ लागेका छन्। पहेँलपुर बनेका सुन्तला टिपेर त्यसलाई आकार र गुणस्तर अनुसार छुट्याउने काम भइरहेको छ। किसानहरूले मेहनतका साथ गरेको ग्रेडिङपछि अब उनीहरूको ध्यान बजार व्यवस्थापनमा केन्द्रित भएको छ।
उत्पादित सुन्तलाको उचित मूल्य सुनिश्चित गर्न र उपभोक्तासम्म सहज पहुँच पुर्याउनका लागि किसानहरू यतिबेला बजार व्यवस्थापनको तयारीमा जुटेका छन्। ग्रेडिङ गरिसकेका सुन्तलालाई पोखरा, बुटवल, नारायणगढ लगायतका ठूला सहरका बजारहरूमा पठाउने तयारी भइरहेको छ। यसका साथै स्थानीय बजारमा समेत सुन्तला बिक्रीको व्यवस्था मिलाइएको छ।
यस वर्ष अनुकूल मौसम र रोगकीराको कम प्रकोपका कारण सुन्तला उत्पादन बढेको अनुमान गरिएको छ। प्रधानमन्त्री कृषि आधुनिकीकरण परियोजना – सुन्तला सुपर जोन कार्यालयका अनुसार चालु सिजनमा करिब २२ हजार मेट्रिकटन सुन्तला उत्पादन हुने प्रारम्भिक अनुमान छ। यसबाट जिल्लाले एक अर्ब ३० करोड रुपैयाँ भन्दा बढी आम्दानी गर्ने लक्ष्य राखेको छ।
स्याङ्जाको सुन्तला गुलियो, रसिलो र स्वादिलो हुने भएकाले यसको माग बजारमा सधैँ उच्च रहने गरेको छ। सुन्तला खेतीबाट किसानहरूले राम्रो आम्दानी गर्न थालेपछि अन्य बाली छाडेर यसप्रति आकर्षित हुनेको संख्या पनि बढ्दो छ।
सुन्तलाको उचित ग्रेडिङ र प्रभावकारी बजार व्यवस्थापनले किसानहरूको मिहिनेत खेर जान नदिने विश्वास लिइएको छ।
