फुलबारी, स्याङ्जा :
श्री धुनी शिवालय फुलबारी गौशालामा रहेका गाईवस्तुको उचित व्यवस्थापन नहुँदा बालीनाली र सागसब्जी नष्ट भएर पीडित बनेका स्थानीय किसानहरूले अब राहतको सास फेर्ने आशा राखेका छन्। लोकप्रिय परोपकारी संस्था इन्द्रेणी टिमले गौशालाको सहयोगार्थ कार्यक्रम आयोजना गरेपछि किसानहरूमा यो उत्साह देखिएको हो।
किसानहरूका अनुसार, गौशालाका गाईवस्तु बेलाबेलामा बाहिर निस्केर वरपरका खेतबारीमा पसेर ठूलो क्षति पुर्याउँदै आएका थिए। इन्द्रेणीको पहलबाट उठेको रकमले स्थायी कर्मचारी राखेर गाईवस्तुको राम्रो हेरचाह तथा उचित व्यवस्थापन हुने र आफूहरूको समस्या समाधान हुनेमा किसानहरू निकै आशावादी छन्।
नाम उल्लेख नगर्ने शर्तमा एकजना किसानले भने, इन्द्रेणीको टिम आएपछि अब उठेको पैसाबाट कर्मचारी राख्लान् र गाईवस्तुलाई राम्रोसँग बाँधेर राख्लान् भन्ने ठूलो आशा छ। यसले हाम्रो बालीनाली जोगाउन मद्दत पुग्नेछ।
इन्द्रेणीको कार्यक्रमले गाईवस्तु व्यवस्थापनको समस्यालाई चर्चामा ल्याएको छ र किसानहरूले राहतको महसुस गरेका छन्। अब गौशालाले उठेको रकमलाई कसरी पारदर्शी ढंगले र प्रभावकारी रूपमा सदुपयोग गर्छ भन्ने कुरामा सबैको ध्यान केन्द्रित भएको छ।
