वालिङ, स्याङ्जा।

        स्याङ्जाको वालिङ नगरपालिका–८, काफलडाँडामा रहेको धुनि शिवालय फुलबारी गौशाला सञ्चालन गर्न आर्थिक संकट आएपछि वृहत सांस्कृतिक कार्यक्रम आयोजना गरिएको छ। गौशालाको दैनिक व्यवस्थापन जटिल बन्दै गएपछि स्रोत जुटाउने उद्देश्यले मङ्सिर १२ गते (आज) चर्चित टेलिभिजन कार्यक्रम 'ईन्द्रणी' मार्फत कोष संकलनको प्रयास गरिएको हो।
मुख्य पहल र प्रायोजन
गौशालाका अध्यक्ष कमल सुवेदी र लोकप्रिय पण्डित नेत्र पराजुली लगायतको पहलमा गौशाला चलिरहेको भए पनि पछिल्लो समय व्यवस्थापनमा हम्मेहम्मे परेको थियो।
कतारमा कार्यरत वालिङका सहयोगीदाता नारायण पंगेनीले कार्यक्रमको मुख्य प्रायोजन गर्नुभएको छ। उहाँको रारा इलेक्ट्रिकल एण्ड कनेक्टिङ वेल कम्पनी मुख्य प्रायोजक रहेको छ।
'ईन्द्रणी बृहत् सांस्कृतिक कार्यक्रम–२०८२' आयोजना गर्न ईन्द्रणी कार्यक्रमका सञ्चालक कृष्ण कडेललाई झण्डै साढे ३ लाख लगानी गरेर वालिङ् ल्याइएको गौशाला सहयोगार्थ समितिले जनाएको छ।
समितिले यस कार्यक्रमबाट गौशालाका लागि आवश्यक आर्थिक श्रोत जुट्ने र गाईहरूको हेरचाहमा सहजता आउने विश्वास लिएको छ।

गौशाला निकट स्रोतले आज दिउँसो आयोजित कार्यक्रममा सबैलाई उपस्थित भई सहयोग गरिदिन अनुरोध गरेको छ।
महत्वपूर्ण जानकारी: गौशाला सहयोगार्थ समितिले सहयोग रकम गौशालाको आधिकारिक खाता तथा रसिद (QR कोडसहित) मा मात्रै गर्न सबै सहयोगी दाताहरूलाई विशेष आग्रह गरेको छ। अनधिकृत व्यक्तिलाई रकम नदिन अनुरोध गरिएको छ।