वालिङ, 

        वालिङ नगरपालिका वाड न ९ पिपलटारी हुँदै वडा न १३ झोलुङ्गे जाने सडक खण्ड निर्माण सम्पन्न भएको महिना दिन पनि नबित्दै भत्किएपछि स्थानीयहरू आक्रोशित बनेका छन्। आर्थिक वर्षको अन्त्यमा बजेट सक्ने हतारोमा गरिएको गुणस्तरहीन कामको नतिजास्वरूप यो बाटो अहिले दयनीय अवस्थामा पुगेको हो ।
प्रदेश सरकारको झण्डै ५ करोड लगानीमा  २०८२ असार महिनामा घामपानीको बेवास्ता गर्दै द्रुत गतिमा निर्माण  सम्पन्न गरिएको सडक महिना महिना दिन नबित्दै ठाउँ-ठाउँमा चिरा परी कालोपत्रे सहित भित्री तह समेत खस्केर झण्डै एक फुट भन्दा तल भासिएको छ ।
स्थलगत रिपोर्टिङका क्रममा देखिएको दृश्यले यो काममा ठेकेदारको चरम लापरवाही वा इन्जिनियरिङ मापदण्डको कमी रहेको देखिन्छ । अनावस्यक ठाउँहरुमा पनि गेभिङ जालीहरु लगाएर तत्कालै बाटो कालोपत्रे गरिएको कारण सामान्य वर्षा पनि थेग्न नसकी बाटो ध्वस्त भएको र करोडौंको रकम हिनामिना भएको स्थानीयको आरोप छ।
निर्माण कार्यको ठेक्का लिने कम्पनीको केही प्रतिशत रकम धरौटी का रूपमा राखिएको हुन्छ तर सडकमा भएको गम्भीर क्षति मर्मतका लागि धरौटी बराबरको रकमले मात्रै नपुग्ने अवस्था छ त्यसैले निस्चित समयावधि भित्र मर्मत गर्नुपर्ने सडक यदि धरौटी कम भयो भने ठेकेदारले यो बाटोलाई यत्तिकै अलपत्र छोड्ने र सार्वजनिक सम्पत्तिमाथि खेलवाड हुने खतरा छ भन्दै स्थानियहरु आक्रोशित बनेका छन ।
अत्याधिक जनगुनासो बढेपछि स्थलगत अनुगमनमा पुगेका सरोकारवाला हरूले पनि सडकको अवस्था चिन्ताजनक रहेको बताएका छन्। जनताको करबाट बनेको करोडौंको रकमको  सडक छोटो समयमै यसरी भत्किनुले आयोजनाको अनुगमन र गुणस्तर नियन्त्रण  गर्ने निकायको भूमिकामाथि गम्भीर प्रश्न उठेको छ। अनुगमनमा संलग्न इन्जिनियरहरूले हतारमा गरिएका गुणस्तरहीन कामलाई पनि स्वीकृति दिनु गम्भीर लापरवाही भएको जनगुनासो छ ।
सम्बन्धित निकायले सम्बन्धित ठेकेदारलाई तत्काल मर्मतका लागि दबाब दिनुपर्ने र गुणस्तरहीन काम गर्नेलाई कारबाहीको दायरामा ल्याउनु पर्ने देखिन्छ।