वालिङको पहिचान झल्काउने उद्देश्यका साथ वालिङ उद्योग वाणिज्य संघले आगामी माघ १४ गतेदेखि २५ गतेसम्म वृहत् वालिङ महोत्सव आयोजना गर्ने भएको छ। वालिङ खेलमैदानमा सञ्चालन हुने यस महोत्सवलाई आयोजकले “हाम्रो गौरव, हाम्रो सान, वालिङ महोत्सव हाम्रो पहिचान” भन्ने मूल नारा दिएको छ।
यो महोत्सवलाई यसपटक गण्डकी प्रादेशिक कृषि, पर्यटन, सांस्कृतिक तथा व्यापार मेला–२०८२ को रूपमा भव्यताका साथ आयोजना गर्ने तयारी गरिएको आयोजकले जनाएको छ।
महोत्सवको व्यवस्थापनको ठेक्का रकमलाई लिएर यसपटक निकै चासो देखिएको छ। स्रोतका अनुसार, अघिल्लो पटक करिब ८० लाख रुपैयाँमा ठेक्का दिइएकोमा यस पटक भने ठेक्का रकम झण्डै एक करोड रुपैयाँ (करोड पुर्याउने) सम्म पुग्नेगरी छलफल भइरहेको छ।
यससँगै, महोत्सवलाई अझ व्यवस्थित बनाउनका लागि पास वितरण प्रणालीलाई व्यवस्थित र चुस्त दुरुस्त गराउने तयारी भइरहेको समेत स्रोतले जानकारी दिएको छ।
वालिङ महोत्सवले यस क्षेत्रको कृषि, पर्यटन, संस्कृति र व्यापारिक गतिविधिहरूलाई प्रवर्धन गर्न महत्त्वपूर्ण भूमिका खेल्ने अपेक्षा गरिएको छ।
