वालिङ्,संवाददाता 

         स्याङ्जाको वालिङ् नगरपालिका–१३, झोलुङ्गेबजारमा रहेको थुमपोखरा प्रहरी चौकीलाई एकथान कम्प्युटर सेट र एउटा भित्ते घडी प्रदान गरिएको छ।
वालिङ्–१३ घर भई हाल काठमाडौंमा व्यवसाय गर्दै आएका युवा व्यवसायी केपी गैह्रेले उक्त सामग्रीहरू प्रहरी चौकीलाई हस्तान्तरण गर्नुभएको हो।
सामग्री हस्तान्तरण कार्यक्रमलाई सम्बोधन गर्दै अकला आवाज साप्ताहिकका प्रधानसम्पादक प्रकाश डुम्रेले युग अनुकूल सुरक्षा निकायलाई प्रविधि मैत्री बनाउन, प्रहरीको सकारात्मक मनोबल बढाउन र प्रहरी तथा समुदायबीच बलियो सम्बन्ध स्थापित गराउन यस्ता रचनात्मक कार्यक्रमहरू आवश्यक हुने बताउनुभयो।
डुम्रेले प्रहरी चौकीका लागि नागरिक सहकार्य र सहयोग अपरिहार्य रहेको भन्दै कम्प्युटर र घडी प्रदान गर्ने दाता केपी गैह्रेलाई धन्यवाद ज्ञापन गर्नुभयो।
सामग्री हस्तान्तरणपछि बोल्दै दाता केपी गैह्रेले प्रहरी चौकीको दैनिक कामकाजमा सहयोग पुगोस् भन्ने उद्देश्यले समस्यालाई मध्यनजर गरी कम्प्युटर प्रदान गरिएको बताउनुभयो।
कार्यक्रममा थुमपोखरा प्रहरी चौकी प्रमुख टेक बहादुर ठाडा मगर, स्थानीय बुद्धिजीवी गोपाल गैह्रे, गल्याङ पोष्ट साप्ताहिकका सम्पादक टीकाराम अधिकारी लगायतको उपस्थिति रहेको थियो।
उक्त कार्यक्रमको सञ्चालन तथा सहजीकरण अकला आवाजका प्रबन्धक ध्रुव गौडेलले गर्नुभएको थियो।