स्याङ्जा 
       नेपाली कांग्रेसका नेता एवं पूर्वमन्त्री मोहम्मद अफताब आलमको निधन भएको छ। स्वास्थ्यमा गम्भीर समस्या देखिएपछि सिनामंगलस्थित काठमाडौं मेडिकल कलेज (KMC) मा भर्ना भई भेन्टिलेटरमा उपचार गराइरहेका आलमको आज बिहान निधन भएको हो।
पारिवारिक स्रोतका अनुसार गत जेठमा नक्खु कारागारबाट रिहा भएलगत्तै उनलाई ब्रेन स्ट्रोक भएको थियो। त्यस समयमा माइतीघरस्थित अन्नपूर्ण न्यूरो अस्पतालमा उनको उपचार गरिएको थियो। पछिल्लो एक महिनादेखि उनी काठमाडौं मेडिकल कलेजमा भर्ना भएका थिए।
⚖️ बम विस्फोट र हत्याको आरोपबाट उच्च अदालतले दिएको थियो सफाइ
स्वर्गीय आलमलाई २०६४ साल चैत २७ गते पहिलो संविधानसभा निर्वाचनको पूर्वसन्ध्यामा रौतहटको राजपुरमा भएको बम विस्फोटको घटनासँग सम्बन्धित दुई जना घाइतेहरू— पिन्टु भनिने त्रिलोकप्रताप सिंह राजपुत र ओसी अख्तरलाई इँटाभट्टामा जलाएर हत्या गरेको आरोपमा जिल्ला अदालत रौतहटले जन्मकैदको सजाय सुनाएको थियो।
तर, उच्च अदालत जनकपुर, अस्थायी इजलास वीरगन्जका न्यायाधीशद्वय खुसीप्रसाद थारु र अर्जुन महर्जनको इजलासले गएको जेठ १४ गते जिल्ला अदालतको फैसला उल्ट्याउँदै पूर्वमन्त्री आलमसहित चार जनालाई सफाइ दिएको थियो। उच्च अदालतको यो फैसलापछि उनी थुनामुक्त भएका थिए। यद्यपि, उच्च अदालतले सफाइ दिएको उक्त फैसलाविरुद्ध सरकारले सर्वोच्च अदालतमा पुनरावेदन दर्ता गरेको थियो।