स्याङ्जाको भीरकोटमा शनिबार आयाेजना गरिएको स्याङ्जाको पत्रकारीता विगत, वर्तमान र भविष्यकाे सम्भावना एवं चुनाैतीका विषयमा अन्तरक्रिया कार्यक्रम सम्पन्न भएको छ । अकला आवाज साप्ताहिक,स्मार्ट खबर र खबरकलम मिडियाकाे आयाेजनामा आयोजित अन्तरक्रिया कार्यक्रममा स्याङ्जाका पत्रकारहरु विचको छलफल एवम् विमर्शले ९ बुदे घोषणापत्र जारी गरेको छ ।
नेपाल पत्रकार महासंघ,विभिन्न पत्रकार सम्बद्ध संघ संगठनहरु,जिल्लामा सञ्चालित सञ्चारगृहका सञ्चालकहरु सहितको उपस्थितिमा भएको कार्यक्रममा गम्भीर समिक्षा सहित स्याङ्जाको विगत,वर्तमान र भावी चुनौति र अवसरहरुको बारेमा छलफल भएको थियोे ।
स्याङ्जाको विकास,समृद्धि र जनताको आवाजको बलियो प्रतिनिधित्व सञ्चार क्षेत्रले गराउने र बदलिँदो परिस्थितिमा मिडियाका भुमिका जिम्मेवार,निष्पक्ष र जवाफदेही बनाउन हातेमालो गर्ने बिषयमा समेत छलफल भएको छ ।
छलफलमा स्थापित गरिएको मुल्य ,मान्यता र विमर्शको सार अनुसार तल उल्लेखित ९ बुंदा सहित भिरकोट घोषणापत्र जारी गरिएको छ ।
कार्यक्रममा पत्रकार महासंघका पुर्व अध्यक्षहरु ओम प्रकाश शर्मा,प्रकाश डोटेल,श्रीकृष्ण सिग्देल हालका अध्यक्ष प्रदीप कोइराला, प्रेस सेन्टरका गण्डकी प्रदेश अध्यक्ष अर्जुन काफ्ले,प्रेस चौतारीका केन्द्रीय सदस्य हिमलाल पराजुली,चौतारिका प्रदेश सचिव गोपाल जिटी,मुक्ति न्यौपाने,पत्रकार महासंघ स्याङ्जाका पुर्व उपाध्यक्ष राधाकृष्ण डुम्रे ,प्रेस सेन्टरका जिल्ला अध्यक्ष केपी खनाल,प्रेस युनियनका अध्यक्ष तोलाकान्त बगाले,जनपत्रकार संगठनका जिल्ला अध्यक्ष ध्रुव गौडेल, सञ्चारिका समुहको उपाध्यक्ष आरती कुंवर,भवानी अधिकारी,नारायण विक,शंकर सुवेदी,अमृत अर्याल,टिकाराम अधिकारी,युवराज पौडेल,सागर न्यौपाने,राम बहादुर रोक्का,पवन मरासिनी,आयुष्मा काफ्ले,विना रेग्मी लगायतले पेशागत मुल्य मान्यतालाई एकताबद्ध गराउन जोड दिएका थिए । कार्यक्रमको आयोजना,उदेश्य र यसको दिर्घकालिन लक्ष्यका बारेमा आयोजक संस्था अकला आवाज साप्ताहिकका अध्यक्ष तथा प्रधानसम्पादक प्रकाश डुम्रेले प्रस्तुत गरेका थिए भने अध्यक्षता आयोजक संस्था स्मार्ट अखबारका सञ्चालक नारायण कोइराला र सञ्चालन खबर कलमका सञ्चालक जीवन अर्यालले गरेका थिए ।
यस्तो छ भीरकोट घोषणापत्र २०८२ !
१) स्याङ्जा जिल्लाभर विभिन्न संचारमाध्यमहरूमा क्रियाशील पत्रकारहरूबिच मैत्रीपूर्ण सहकार्य एवं सम्बन्ध स्थापित गर्न जोड दिने ।
२) स्याङ्जाको पत्रकारीताको ऐतिहासिक दस्तावेज तयार पार्न सबै क्रियाशील पत्रकार एकजुट भएर काम अगाडि बढ्ने ।
३) पेशागत मर्यादालाई उच्च प्राथमिकतामा राख्दै पत्रकारको पेशागत सुरक्षा र आत्मसम्मानप्रति एकताबद्ध र दृढ रहने वातावरण गराउने ।
४) स्याङ्जाका आम नागरिकको जनबोलीको प्रतिनिधित्व गर्दै सकारात्मक, नैतिक, सभ्य र मर्यादित समाज निर्माणमा मिडिया मार्फत सकारात्मक र सिर्जनात्मक भूमिका खेल्ने ।
५) सिद्धार्थ राजमार्ग स्तरोन्नतिका लागि सरोकारवाला निकायको तत्काल ध्यानाकर्षण गराउने ।
६) स्याङ्जाको आन्तरिक एवं बाह्य पर्यटन प्रबर्द्धनको लागि संचार माध्यमबाट पहल गर्दै सरोकारवाला निकायबिच हातेमालो गर्ने !
७) जिल्ला स्थित सरकारी निकायहरूले प्रकाशन गर्नुपर्ने टेण्डर, सूचना , लोककल्याणकारी विज्ञापन एवं विभिन्न सूचनाहरू स्याङ्जामा संचालित संचारगृहहरूमा उच्च प्राथमिकताका साथ प्रकाशित गर्न गराउन सम्बद्ध निकायको ध्यानाकर्षण गराउने ।
८) स्याङ्जा जन्मथलो भई स्वदेश तथा विदेशमा रही पत्रकारितामा सक्रिय सबै कलमजिवीहरुलाई भावनात्मक ढंगले एकजुट गराउने ।
९) स्याङ्जाको पत्रकारितामा पत्रकार महासंघलाई अगुवा संस्थाको रूपमा लिदै यसलाई गतिशील र शसक्त बनाउन सबै कृयाशील पत्रकारहरु एकजुट हुने।
बोधार्थ :
नेपाल पत्रकार महासंघ, स्याङ्जा
जिल्ला प्रशासन कार्यालय, स्याङ्जा
नेपाल पत्रकार महासंघ, गण्डकी प्रदेश
स्याङ्जाको सबै स्थानीय तहहरु
